Logo
Nationaler Spieltag

Di da giugs naziunal a Disentis/Mustèr

Sonda, ils 24 da matg 2014 ha giu liug per la 8avla gada il di naziunal da giugs. Il tema dil di dad uonn ei staus „aua envida da termagliar“. Il di naziunal da giugs vegn menaus atras mintga treis onns. L’organisaziun d’in tal di schai  tier las ludotecas en ils vitgs e marcaus. Igl emprem di naziunal da giugs ha giu liug igl onn 1993.

Purtadra da quei di da giugs ei  l’associaziun svizra dallas ludotecas. Quei di ha duas finamiras:  Far attents sin l’impurtonza dil giug en il svilup digl affon e far pli enconuschenttas las ludotecas en las regiuns.

Aschia han era ils affons dallas vischnauncas dalla Sursassiala saviu passentar in emperneivel suentermiezdi cun giugs tier il tema aua. Cunquei che l’aura ei stada dètg buna eisi stau pusseivel da pinar tier ina pulita retscha giugs cun aua silla plazza avon la halla Cons. Il program ei staus fetg varionts: naven da sittar rachettas dad aua, stizzar candeilas cun pistolas dad aua, far bullas giganticas cun aua da savun, far musica cun migieuls e butteglias empleni cun bia ni pauc aua, trer muneidas en ina fontauna da cletg, termagliar cun bastiments e rodas dad aua tochen tier faldar e colurar bastiments. Ella ludoteca han ils affons saviu empruar ora giugs da scatla per gronda part tier il tema aua. Igl ei era stau pusseivel dad empristar ora giugs.

Affons e geniturs sco era il team dalla ludoteca Mustér han gudiu quei bi suentermiezdi.

Il team dalla ludoteca Mustér

Temps d’avertura dalla ludoteca disentis/mustér:

  • gliendisdis e venderdis dallas 18.30 – 20.00 uras (igl entir onn)
  • gievgia dallas 16.00 – 17.30 uras (senza fenadur ed uost)
Facebook-Logo